التخطي إلى المحتوى الرئيسي

things to do in free time | أشياء تسويها وقت الفراغ


مساء / صباح الحلاوة يا حلوين 

دايماً تجينا أوقات نكون طفشانين و نحس انو يومنا فاضي بس مو عارفين ايش نسوي أو تكوني متضايقة و متمللة من روتينك و حاسة بكآبة و ضيقة و نفسك تبكي << مدري إذا هذا شي طبيعي أولا انا اعتبره طبيعي 😅 أو بكل بساطة عندك وقت فراغ و حابة تسوي شي فيه 😀 هذي إقتراحات أشياء أنا أحب أسويها لمى يكون عندي شي من هذي الأشياء سواء وقت فراغ أو اكتئاب من الروتين و غيره . 




 المشي .
ما تصدقون كيف المشي يغير النفسية و يخليك تروقي 😴 عن نفسي لمى امشي مرا انبسط و احس براحة و تتجدد نفسيتي أحب أنزل اتمشى في الشارع أشوف الناس الرايحة و الجاية و أشوف البيوت كيف أشكالها و الحدايق  و الشجر و السماء كل شي 💗 ، اذا انتي ما تحبي تمشي او تقولي ما عندك مناظر حلوة عشان تمشي فيها🚶🏽‍♀️ جربي روحي بقالة أو كوفي أو أي شي قريب من بيتك شعور مرا جميل و تعتبر مغامرة زمان كنت أروح أنا و ماما و أخواتي البقالة مشي أو الكوفي أو نروح نشتري ايسكريم 🍦و أحيان اروح الصباح اشتري دونات 🍩 ذكريات حلوة ، جربوا يوم كذا اطلعوا مع أخواتكم أو صحباتكم أو قريباتكم تطلعوا و دحين الجو بدأ يتعدل فإذا جنبكم حديقة أو بحر لا تضيعوا الفرصة و التجربة الحلوة . 



محاكاة طبق عجبك في مطعم . 
كمان من الأشياء الحلوة و اللذيذة الي تسويها وقت الفراغ تحاولي تسوي أكلة 🍔🍤 أو حلى 🍰🍨  أو مشروب 🍹ت حبي تطلبيه في المطاعم عن نفسي أحب أي شي يعجبني أحاول أسوي زيه و أنبسط لمى أجرب اسويه طبعاً إذا كانت طريقته سهلة 😊 ، أو ممكن تخبصي و تسوي أكلة من راسك هذي المتعة صح لمى تحطي مقادير من عقلك و بعدين تطلع الطبخة لزيزة و جهي يسير 😍 و أحس اني شيف و أستحق جائزة 🏆 . 



 مارسي هواية من هواياتك . 
ايش أحسن من انك تسوي شي تحبيه 💗 سواء كان رسم أو قراءة أو تصوير طبخ أي شي تحبيه .



أقرأي كتاب . 
من الأشياء الي احب وقت الفراغ أقرأ كتاب خفيف و موضوع حلو و من اهتمامتي  أو عن شي نفسي أعرف عنه بس أركز انه الكتاب يكون عدد صفحاته شوي عشان أقدر أخلصه بسرعة ، إذا كنتي مو من محبين الكتب ممكن تجلسي تبحثي في النت عن أشياء حابة تعرفينها أو شي حابة تطوريه في نفسك . 



سبا داي .

{وَإِنَّ لنَفْسِكَ عَلَيْكَ حَقّاً} ، بالنسبة لي مسوية روتين عناية يومي و أسبوعي و شهري ، بس لمى أكون فاضية أو مريت باسبوع متعب أحب أخلي روتين العناية دلوع 😂 يعني اسوي لنفسي عصير بارد فريش أو شي دافي حسب المود و أجلس في المكان الي أحبه و  أشغل أغاني و أحط لي شموع بريحة و أسوي ماسك في وجهي و شعري و أحياناً اتفرج موفي كيوت حق بنات 😂 عاد مرا أحب الأفلام الي كذا بنوتية زي clueless و mean girls و غيرها من هذي الفئة 💕 و بعدين يا آخذ شاور و أسوي سكرب أو إذا عندي باث بومب آخذ لي باثي و آحط شمعة ريحتها حلوة و رايقة و أسوي تنظيف بشرة و بعد ما اخلص أحس اني كأني سافرت غيرت جو و رجعت 💆.



تواصلي مع أحد من زمان ما كلمتيه .
على كثرة تطبيقات التواصل و المكالمات إلا أني جداً فاشلة في التواصل مع الناس عن طريقهم 😞، ما أحب اتكلم كثير بالكتابة ولا الفيديو حتى دايماً صحباتي و قريباتي يقولوا لي تتكلمي بالقطارة الكلام ينسحب منك كذا سبحان الله ما أحب ، و بعد ما خلصت مدرسة سحبت سحبة محترمة على صحباتي فسرت كل فترة كل ما اكون فاضية ارسل رسالة لأحد مرة صحبتي مرة عمتي مرة قريبتي زي كذا و هالشي فرق معايا كثير في التواصل سرت ما أقطع أحد فترة طويلة إلا أحيان تجيني حالة أكره الواتس اب و الاشياء هذي فأسحب على الكل زي هذي الفترة لسى دا الأسبوع رجعت أتواصل مع العالم ، بس ساروا هم يتواصلوا معايا لأنهم تعودوا بالنسبة لي هذا شي مرا حلو بالذات انو كل شخص مشغول بحياته فحلو كل ما فضيتي تتواصلي مع أحد من زمان ما كلمتي بالنسبة لي إذا أحد كلمني و أنا من زمان ما كلمته مرا أفرح و اسير اليوم كله مبسوطة مرة كل شهر أو حتى شهريين تفرق كثير 📞💌 . 



جلسة تخاطب مع النفس .
حلو بين فترة و فترة تجلسي جلسة لوحدك و تشوفي ايش سويتي هذي الفترة ؟ و صلتي للمكان إلي انتي تبغيه ولا لا ؟ حققتي الأهداف الي حاطتها في بالك ؟ زي كذا و تشوفي ايش سويتي و ايش ما سويتي و تحاولي تعالجي الأشياء الخطأ و تصلحيها عشان توصلي لأهدافك 💗 ، و في شي أحب أسويه لمى أحس بإحباط أو إكتئاب الله يبعده عنكم عشان أحفز نفسي ع التفاؤل و النشاط أجيب ورقة 📝 و أكتب فيها كل شي أبغى أغيره في نفسي و مو عاجبني و إذا شفتها أشياء كثير أكتب الأشياء الي غيرتها في نفسي و أشياء انجزتها خلينا من الأشياء الحلوة نجي للأشياء السلبية بعد ما أخلص كتابة أقرأ الورقة مرا ثانية و اطبقها و أخبيها و بعدين أقرر أنو خلال مثل الشهرين هذي أغير كل شي فيها لشي حلو للأمانة حركة الورقة سويتها ممكن مرتين أو ثلاثة بس مرا تفرق لمى تشوفي الورقة بعد ما تنتهي المدة و تشوفي انو بعزيمتك و إصرارك غيرتي الشي الي مو حلو لشي حلو و بعدين تاخذي و ترميها 😂 بس  كل سنة بداية السنة أكتب اهداف مختلفة و افتحها نهاية السنة و أشوف ايش سويت منها أول مرا سويت أهداف السنة كنت ممكن ثاني أو ثالث ما سويتها بداية السنة ممكن في نصها المهم و من الأهداف الي حطيتها كنت مرا خجولة لدرجة صوتي يالله يطلع فقررت أني أغير هذا فيني فبديت أجبر نفسي اتكلم إذا بخجل أو زسويشي استحيت اسويه و اذا شفت وحدة ما اعرفها مثلاً في انتظار أو جمبي في مناسبة احاول اكلمها و شوية و شوية لحد ما الخجل راح و ثقتي بنفسي زادت بإختصار عشان لا أطول إنو ما في شي صعب بإذن الله إنتي بإرادتك و عزيمتك و إصرارك تحددي إذا الشي هذا صعب أو لا إذا ترددتي و خفتي راح تشوفيه صعب فقولي لنفسك دايماً مافي شي صعب أنا أقدر أسوي أي شي أبغاه 💪 و إذا فشلتي أول مرا حاولي و حاولي لحد ما تتقني مافي شي مستحيل تقدري تغيري أو تسوي أي شي إذا حطيتي في بالك إنك حتسويه و لا تستني تشجيع من أحد أو دعم لأنو مو دايم متوفر خليكي انتي داعمة نفسك بنفسك لأنه هذا الشي في النهاية لك إنتي 💗، إذا مرا لازم أحد يشجك عشان تسوي مو مشكلة أنا أشجعكم 😌 😂😘 . 




الخروج من منطقة الراحة . 
أقصد بها أنو تسوي شي جديد عليك ما عمرك سويتهيه أو شي نفسك تسوي بس تأجليه أو متردده تسويه جربي م حتخسري إذا ضبط أو لا بس متأكدة إنك راح تفرحي و يجيك شعور بالسعادة إنك جربتي شي جديد مثلاً من زمان نفسك تروحي الملاهي و تلعبي لعبة قطار الموت 🎢 بس خايفة روحي الملاهي و العبيه بدون تررد حتى لو خفتي و انتي فيه لمى تنزلي راح تحسي بشعور جداً جميل و شعور انك انجزتي شي هذا مثال بسيط بس في حاجات كثير كذا نكون نفسنا نسويها بس نتررد و لمى نطنش التردد و الخوف و نتشجع نسويها نفرح كثير بالنسبة لي أفضل وقت أجرب شي نفسي اسويه من زمان لمى يكون عندي وقت فراغ مدري ايش أسوي فيه أو متضايقة و حابة أغير جو .

و بس أحس تكلمت كثير 😅 بس كلام من قلبي إن شاء الله تسفيدوا و الله يجعل كل أيامكم سعيدة 💜.



تابعيني على شبكات التواصل الاجتماعي : 


أو 

و عشان توصلك التدوينات أول  بأول على المربع الأزرق الي مكتوب فيه متابعة 💗
photo sig_zpsnzw9exvy.jpg


تعليقات

  1. كلها اشياء جميله ومفيدة، اكثر شي احب اسويه بشكل يومي المشي. تدوينه جميله جدا ❤❤❤

    ردحذف
    الردود
    1. المشي شي جميل مرا يغير النفسية

      حذف
  2. اكثر شي باديه اسويه في وقت فراغي اقراء او اسمع كتب صوتيه ...جد متعه

    ردحذف
    الردود
    1. متعة و استفادة بنفس الوقت 👌🏽

      حذف
  3. حبيت الموضوع، و الأفكار لطيفه

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .