التخطي إلى المحتوى الرئيسي

مشترياتي و مفضلاتي الفترة الأخيرة


اهلين بنات
مساء / صباح الجمال 💗
تدوينة اليوم عن مفضلاتي الفترة الآخيرة و مشترياتي المتواضعة من مكياج و منتجات عناية  ...


١- مفضلاتي :


زيت الجلسرين
 ترطيبه حلو اكثر شي احبه فيه انو بدون ريحة و تمتصه البشرة بسرعة تكلمت عنه هنا .





شامبو و بلسم و زيت الارجان من لي ستافورد : 
حبيتهم لأني لاحظت تحسن في شعري لمى استخدمتهم خصوصاً الزيت ، تكلمت عنهم في تدوينة هنا . 




بلشرات : 
بلشر من شانيل لونه وردي و فيه شوية لمعة اسمه ( 72 rose initial ) من زمان عندي بس ما كنت استخدمه كثير دحين معلقة عليه لانه خفيف فحلو لكل يوم ، و الثاني ترددت اكتب عنه لأنه ما سار ينباع بس مرا عاجبني قلت لازم اتكلم عنه 😁باليت من توفيسد حق كريسمس ٢٠١٦ برضو بلشراته ما كنت استخدمها كنت احسبها مو حلوة بس طلعت ممتازة و الوانها حلوة و ثابتة و البرونز حقه كمان عجبني سرت استخدمه كبلشر في الصورة يبين غامق بس في الطبيعة لونه فاتح احسه ينفع كمان هايلاتر للي بشرتهم سمرا .





غسول و مرطب من كلينك تكلم عنهم هنا .
ماسك الطين الأوربي :
اتوقع الكل سمع عنه كل الناس تمدحه حبيته ينظف البشرة و يعطيها نضارة شوية جداً حلو للبشرتهم دهنية ، أول ما استخدمته تحسست منه بعدين سرت أحط معاه شوية زيت جوجوبا و ضبط . 





مرطب شفايف من فازلين سعره رخيص و كميته كبيرة جداً و ترطيبه حلو . 



روج من نيكس اسمه Prague .
ايلانر جل من ايلف . 





٢- مشترياتي :

مشتريات حبيتها:


روج مطفي من ماك اسمه Ruby woo .


بودرة من ريميل لندن هنا .




فرشة تانجل تيزر : 
قبل لا اشتريها كانت عندي ويت برش حلوة بس حبيت هذي اكثر لانه ذا ويت ال اعتقد اسمها اسنان المهم اسنان الفرشة مرة لينة ف لمى يكون الشعر مرا متشابك ما تمشطه كويس و اما فرشة تانجل اسنانها أقوى  و أصغر فتفك التشابك بسهولة و تمشط الشعر تمام . 

بخاخ شعر من charles worthington : 
البراند هذي ما عمري سمعت عنها و أول مرا اجرب شي منها ، أفتكر زمان و أنا صغيرة ماما اشترت لنا بخاخ حق جونسون اظن اشترتوا كم مرا و بعدين بطلت قالت قالوا مو كويس و كنت مرا احبو لانو يخليني امشط شعري بسهولة تعرفوا و احنا صغار اكثر شي يعذبنا تمشيط الشعر 😂 و من بعدها ما جربت شي زي كذا و فترة لمى شعري سار جاف مرا كان التشابك يتعبني و لمى شفت البخاخ 😍😍 مرا فرحت يخفف التشابك بشكل فضيع يستخدم على شعر مبلول أو جاف و ينفع للشعر المصبوغ .





 مقشر القدم من بودي شوب احبه 💕 و ريحته حلوه و ينعش القدم و الشي الثاني مبرد القدم جميل حبيته اكثر لمى اسويه و و رجلي ( اكرمكم الله ) ناشفة احسه يقشر احسن و كمان المبرد نفسه ناعم ما يجرح الرجل . 





مقشر الجسم من سوب آند جلوري : 
مدري ايش أقول عنه ريحته تجنن 😍 و ينظف البشرة و يزيل الجلد الميد و حبيباته ناعمة و ما تذوب بسرعة و خفيفة و ما تجرح البشرة و فيه زيوت يرطب البشرة مكوناته زيوت و سكر و شوية ملح بحري للأسف أنا اتحسس من الملح البحري فما أقدر استخدمه كثير ولا اطول وانا اسويه المفروض لمى احطه و افرك جسمي خمس دقايق بس انا بسرعة بسرعة عشان يحرق بس النتيجة تكون حلوة و كمان فيه جليتر صغير جداً فالبشرة تسير ناعمة و فيها لمعة من السكرب و الجليتر 😍 مرا حلو تسويه قبل مناسبة . 



ماسك و غسول للوجه من اوريجنس : 
الماسك ينظف المسام مبدئياً عاجبني ، الغسول فكرته جديدة عليه قوامه موسي كانه حق الحلاقة حق الرجال جميل يخلي البشرة منتعشة راح اتكلم عنهم بالتفصيل قريب إن شاء الله . 





Spot wand :
منتج للحبوب لمى تطلع لك حبة تحطيه عليها يخليها تروح  فيه جهتين جهة للصباح و جهة لليل حبيت النتيجة الي عطاني هي .




مزيل مناكير بوتس : 
يجنن 😍 ينزل المناكير بسهولة و خالي من الاسيتون ريحته مو قوية و ما يخشن الأظافر بالعكس ينعمها . 




مشتريات ما حبيتها :


كتبت عنه في الانسجرام هنا.





كمان تكلمت عنه هنا




 غسول للوجه من غارنييه : 
هوا غسول و مزيل للمكياج انا اشتريته كمزيل مرا كنت متحمسة اجربه توقعته بيكون حلو زي مزيل الميسليلار بس طلع سئ للأسف أول شي ما ينظف المكياج عدل و كمان مرا جفف بشرتي . 




غسول و مقشر الجسم  من اوريجنس :
أول شي المقشر ريحته تجنن احسها ريحة سبا يخلي الصداع يروح و كمان يعطي احساس انو البشرة تتنفس بس مستحيل اشتريه لانه غالي و مكوناته عادية جدا سكر و زيوت مرا كثير و السكر الي فيه يذوب على طول ما يمدي اسوي سكرب ماينفع الا على بشرة جافة يعني الي حابة تدلع نفسها تشتريه المكون الاساسي في البامبو يزيل الاوساخ من البشرة ، بالنسبة للصابون برضو من مكوناته البامبو و ريحتة نعناع بس مو زي المقشر المقشر ريحته احلى المفروض انه ينظف البشرة تنظيف عميق مدري إذا صح او لا بس الي لاحظته انه يعطي البشرة نعومة صراحة احترت فيهم حلوين مع بعض بس سعرهم مبالغ فيه في أشياء كثير زيهم و أرخص . 

انتهيت 💗 ، اتوقع أنا مستحيل أكتب تدوينة كلامها شوي 💔 احاول اقلص الكلام قد ما أقدر مافيش فايدة .



تابعيني على شبكات التواصل الاجتماعي : 



أو 
photo sig_zpsnzw9exvy.jpg

تعليقات

  1. أزال أحد مشرفي المدونة هذا التعليق.

    ردحذف
  2. أزال أحد مشرفي المدونة هذا التعليق.

    ردحذف
  3. ذوقك بالاوراج حسيت نفس ذوقي 😂🌚، تحمست للونين الي عرضتيهم وحطيتهم بالقائمه وان شاء الله أجيبهم ، أما بالنسبه لشرحك أو كلامك عن المنتجات ، احس حلو مو طويل وأصلاً مفروض إنك تطولي كلام وتضيفي شرح للمنتج ، وتوضحي ايش نوعيه بشرتك وهكذا ، عشان البنات كل وحده بشرتها مختلفه ف تعرف ان ليش انتي سبب لك ذا المنتج جفاف وليش هذا طلع لك حبوب وهكذا ، بس حبيت اسلوبك في الطرح ما شاء الله أستمري 😻❤

    ردحذف
  4. مفضلاتك تحمس وغير مكرررة عن الجميع
    بلاشر شانيل خطيررر
    و روج نيكس ❤️❤️❤️❤️

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .