التخطي إلى المحتوى الرئيسي

the end of 2015 | نهاية عام 2015





مساء \ صباح الاجواء الجميلة

في اخر ساعات و دقائق عام 2015 راح اكتب عن انجازت و اهداف حققتها او خليني اقول اشياء سويتها و حبيتها في عام 2015 لانو احسها انسب لانو الاشياء الي حكتبها اغلبها سطحية  , عام 2015 يعني لي الكثير و سارت فيه احداث مفرحة كثير بالنسبة لي ❤ و إن شاء الله انتو كمان زيي ❤ فحبيت اكتب عنه هنا كارشيف ارجع له بعد سنين الله يطول بأعمارنا يارب ❤ .





أول حدث مهم كان تخرجي من الثانوي و الحمدلله دائماً أقول ليتني ما خلصت ثانوي أيام الثانوي أو المدرسة بشكل عام مرا جميلة ❤ كل يوم أشوف صحباتي و اجلس معاهم ربع يومي و مزح و استهبال و كل شي معاهم و فجأة في يوم و ليلة خلاص ما سرنا نشوف بعض الا مرا في الشهر 💔 الي تزوجت و الي دخلت جامعة و الي سافرت و كل وحدة لاهية في حياتها و أنا ان شاء الله داخلة الجامعة بس ارتاح شوية 😂 و حفلة التخرج كانت من احلى ايام حياتي مرا شعور حلو لمى اهلك و كل الناس الي تحبيهم يكونوا معاك و فرحانين لك الله لا يحرمنا من حبايبنا يارب ❤ .

ثاني حدث مهم لمى قررت أسوي المدونة شي جميل انو اضيع وقتي في شي يفيد غيري و يكون ارشيف لي في اشياء و لغيري كمان و الاجمل أنو بابا حبيبي الله يحفظه و يخليه لينا شجعني على دا الشي و اختي كمان الله يسعدها و ويوفقها و الاجمل كمان و الي ما توقعنه أبداً عدد القراء بجد شكرا لكل وحدة  قرأت في مدونتي و اتمنى أنك استفدتي منها و لو شي بسيط ❤ .

ثالث حدث مهم هو مو حدث بس شي 😂 المهم دي السنة عرفت حقيقة ناس كثير من جد المواقف تخليك تشوفي الناس على حقيقتهم ، الي يقهر انو فيمنهم الي يكونوا قراب لك مرا بس بسبب شي تافه يقلبوا عليك 180 درجة طيب و العشرة الي بيننا ؟! كلها طارت و البعض اصلاً ما يكلمك إلا عشان مصلحة و يا كثرهم الي كذا و بعضهم مفهيين 😂 هذول اصدقاءالدراسة أول ما تخلص المدرسة يسحبون ، بنات فصلي مسويين قروب قبل ما نخلص و أيام الاختبارات 24 ساعة يتكلمونو يا بنات حتوحشوني و لازم نبقى على اتصال و من دا الكلام و بعد الاختبارات تكلمو كم يوم عشان النسب و بعدين في رمضان و خلاص 😂 بس النوعيات الثانية هذول موجود للأبد في الحياة للأسف حتى الأقارب فيه منهم كذا 💔 مدري ايش  سبب انقلابهم فجأة ع العموم وجودهم في حياتي أو عدمه واحد .

رابع شي ( تطوير الذات ) دي السنة حاولت قد ما أقدر أغير أشياء في نفسي زي مثلا لمى تعلمت ماكياج و كمان حاولت قد ما أقدر أخلي روتيني صحي في كل شي ضبطت معاي في الأكل شوي بس و في الرياضة نص نص شهر اسوي رياضة و شهر لا 😂 أما في النوم ابداً كل ما أعدل نومي يخبص للأبد هالشي مستحيل يتغير و كمان قرأت كتب كثير بالنسبة للسنين الي فاتت اممممم و تعلمت أشياء و دورت لي هواية 😂  😂 . 

خامس حدث أول مرا في حياتي أطلب اون لاين و أول مرا في حياتي اطلب من الانستجرام و من بعدها مسكت خط 😂 و كان و مازال شعور جميل لمى اطلب و اجلس استنى متى يوصل الطلب و اتحمس مرا لمى انتظره هههههههه .


الي ما يعرفني أنا انسانة اعشق الافلام و المسلسلات الامريكة طبعاً فراح اكتب اسماء الافلام و المسلسلات الي خلصتها وحبيتها :)


المسلسلات

1- Revenge❤ : قصته جميلة جداً كله غموض و أكشن ، يتكلم عن بنت اسمها اماندا كلارك ابوها اسمو دايفيد كلارك و كان يشتغل في شركة عائلة جرايسون و بعدين سار انفجار و اتهموا ابوها و انسجن و عاشت حياة بائسة في طفولتها و انقتل ابوها في السجن فقررت تنتقم من كل الي لفقوا لابوها التهمة هذي مختصر بسيط جداً جداً لاحداث المسلسل ، المسلسل من 4 أجزاء .

2- Gossip Girl : المسلسل المشهور جداً ممكن أنا آخر وحدة اشوفو :) ، يعني مو مرا ذاك الحلو ممكن الي يحب الدراما و الرومنسية راح يعجبة أنا حبيته لأني احب المسلسلات و الافلام الي من دا النوع الي تكون بناتية 😂 يعني حق بنات مرا احب اتفرج افلام زي كذا ❤ الي في المدرسة أو الجامعة باختصار حق teenagers ، بس يقهر انو مرا طويل و بدون قصة ما في احداث .

3- Pretty Little Lairs : عشق ❤ مستوعبين اني اتفرجوا من المتوسط الين دحين لسى ما خلص باقي اخر حلقة راح تنزل 12 يناير 😂 ، احلى شي انو فيه كل شي احبه المدرسة و الاكشن و الغموض 😂 ما حكتب القصة تقدرو تشوفوها في ويكبيديا او اي مكان البوست حيسير طويل مرا :) .

4 - scream queens 2015 : مسلسل الخريف احب مسلسلات الخريف ❤ لانها تكون رعب أو اكشن أو غموض ... المسلسل جميل و كيوت 😂 .

5- 2 broke girls : عندي لازم اتابع مسلسل كوميدي سامج 😂 كتغيير جو و المسلسلات الكوميدية اللغة فيها سهلة جداً فحلو تتعلمي منها ، المسلسل له كم سنة و خلص دي السنة .

6- young & hungry : بعد ما خلص 2 broke girl تفرجت دا حلو و يضحك البطلة حقو ايملي اوسمنت ( ليلي ) حق هانا مونتانا .

7- CSI:cyper : معروفة مسلسلات CSI حق تحقيقات الجرائم شفت حق ميامي و نيويورك و لاس فيغاس و دا نفس الفكرة بس الجرائم جرائم الكترونية مدري كا اسمها او لا يعني تكون عن طريق الانترنت و الهاكرز و كذا .

الأفلام


1- pitch perfect 2: اكثر شي كنت متحمسة له في2015 لانو الجزء الأول كان مرا يجنن لدرجة اني شفتو اكتر من 3 مرات ❤ و كمان الجزء 2 حلو ❤ .

2- invisible sister : مين ما يحب افلام ديزني حق teenager عشق ❤ .
3- the maze runner 

4- taken3 : من افلام الاكشن الجميلة احب الافلام الي كذا جرايم و استخبارات و مدري ايش 😂 .

من كثر الأفلام و ا‍‍ل‍مسلسلات الي تفرجتها  نسيت ايش الأفلام الي مرا حبتها دي السنة 😂 هذي جزء من افلام و مسلسلات حبيتها دا العام .

جزء من أغاني 2015

الأغاني الي علقت عليها دي السنة 😂 .

1- All of me - Jhone Legend .

2- Justin Bieber - purposes album تقريباً كل اغاني الالبوم حلوة حاليا معلقه عليه 😂 .

3-( Meghan Trainor ( all about that bass - close your eyes - dear future housband .

4- ( Selena my fav singer ( good for you - like a champion - save the day album .

تطبيقات الجوال و التابلت ( الأجهزة الذكية ) :

1- snapchat حبيب الكل .

2- لعبة Kim Kardasian Hollywood مرا تعجبني دي اللعبة هههههه و كنت ادمان عليها ولمى تفرمت الجوال سحبت هههه .

3- لعبة INSIDE OUT دي ادمان في دي الفترة .

4- برنامج Studio لتعديل الصور و الكتابة عليها مرا جميل انصحكم فيه خصوصاً الي يحب يكتب ع الصور بديزاين .

5- برنامج vsco cam برنامج تعديل الصور الفلاتر حقو جمييلة .

6- برنامج أنغامي .

7- لعبة Blitz .

8- لعبة minion rush .

15 شي عشوائي حبيته في 2015 :

1- كتاب بيكاسو و ستاربكس

2- كاساديا فرايديز ادمااااان ❤ .

3- روج nyx أبوظبي .

4- ماسكرا بورجوا السودا volume glamour max .

5- أرواج ريميل بصفة عامة .

6- كيك ساريتا بالشوكلاتة هههههه لأنو ما احب كيكات الشوكلاتة بس هذا مرا حبيته و ادمنت عليه ❤ .

7- اللون العودي .

8- استخدام بلانر أو كاليندر لتنظيم الوقت .

9- التدوين ❤ ❤ .

10- الفوتوشوب ليتني من زمان تعلمته .

11- كنافة مطعم السدة ❤ 😂 .

12- رواية اغاثا كريستي جريمة من ثلاث فصول احب رواياتها بشكل عام .

13- عطر فرزاتشي كريستال .

14- كتاب طريق التوازن .

15- الماكرون .

و دحين كمان حفتح الورقة الي كتبتها أول يوم في السنة و حشوف ايش سويت منها و اكتب حق دي السنة ❤  و اكتبوا لي في الكومنت ايش احلى الأشياء الي سارت لكم في 2015 و مفضلاتكم فيه ، و كل عام و أنتم بخير و ان شاء الله السنة هذي تكون أجمل من الي قبلها ❤ .

تعليقات

  1. اقدر اقول اكتشفت اشياء مشتركه بيني وبينك
    واولها حبك لبرتي القصه صارت طويله

    ردحذف
  2. ماشاء الله سنة منجزة فعلاً ، يارب كل سنة في تطوّر ..❤

    ردحذف

إرسال تعليق

المشاركات الشائعة من هذه المدونة

نتيجة تجربتي لتمارين كلوي تينغ

مساء/ صباح الخير  موضوع التدوينة واضح من العنوان  🏃🏻‍♀️  إذا انتي جديدة في عالم الرياضة، كسولة، تملي من الروتين، تبغي تمارين بسيطة و ما تتعب مرة بس نتيجتها حلوة و تفرق كملي قراءة التدوينة للنهاية،

تجربتي لمنتجات ماوي مويستر (مجموعة زبدة الشيا) منتجات شعر طبيعية | Maui moisture

صباح / مساء الجمال ✨ يالله أحس من زمان ما تكلمت عن منتجات عناية بالشعر 🙆🏽‍♀️ اليوم حقولكم عن تجربتي لمنتجات الشعر من ماوي مويستر و هي براند امريكية 🇺🇸 اكثر شي حمسني اجربها هو انها تعتبر طبيعية 🌿 و اهم شي لحظة 🤦🏽‍♀️ خلوني أول شي اقولكم نوعية شعري 👩🏻‍🏫، طبيعة شعري جاف ع قولة ماما يشرب الزيت لأني دايماً اهتم في و أزيته و النتيجة بعد فترة تبين و إذا سحبت اسبوع أو اثنين عناية الشهور الماضية كلها ع الفاضي زيادة ع طبيعته الجافة ما اشرب مويا تمام غذائي مو تمام فتقصف الشعر و تعب حالياً الحمدلله التقصف و التلف خف كثير آخر ٥ شهور بس الجفاف لا مفر منه المهم دايماً أبحث 🕵🏽‍♀️عن شامبوهات كويسة

اصنعي غلاف لهايلايت الإنستجرام الخاص بك بطريقة سهلة جداً ✨

مساء / صباح الخير يا جميلات من فترة سارت موضة جديدة في الإنستجرام عند البلوجرز و الانفلونسرز و انتشرت بسرعة الي هي غلاف أو خلفية لهايلايت الإنستجرام و مرا حبيتها جداً جميلة و كيوت 😻 و أحسها ترتب الحساب ف من وجهت نظري أحس لازم أى بلوجر تسويها في إنستجرامها إذا عندها هايلايتس لأنها تبين الحساب مرتب و بروفيشنال ف راح أحط لكم طريقتين و كل وحدة أسهل من الثانية .